चोरी, घरफोडी व लुटमारीतील सराईत आरोपींसह तिघांना जवाहरनगर पोलिसांची अटक
दैनिक शब्दमत न्युज नेटवर्क
छत्रपती संभाजीनगर, दि. २० : चोरी, घरफोडी व लुटमारीसारख्या गंभीर गुन्ह्यांमध्ये सहभागी असलेल्या सराईत आरोपींसह तिघांना जवाहरनगर पोलिसांनी ताब्यात घेतले आहे. आरोपींच्या चौकशीत घरफोडी व चोरीचे चार गुन्हे उघडकीस आले असून, त्यांच्याकडून सुमारे १ लाख २५ हजार रुपये किमतीची मोटारसायकल तसेच अन्य मुद्देमाल जप्त करण्यात आला आहे.
७ ऑगस्ट रोजी रात्री योगेश्वरी अपार्टमेंट परिसरात घरफोडी करून टेपरेकॉर्डर चोरीला गेल्याची तक्रार सुनील रवींद्र यांनी जवाहरनगर पोलीस ठाण्यात दिली होती. याप्रकरणी गुन्हा क्र. ३२९/२०२६ अन्वये गुन्हा दाखल करण्यात आला होता. घटनास्थळावरील सीसीटीव्ही फुटेजच्या आधारे पोलिसांनी तपास करत शेख आदिल शेख जावेद, रा. शंभुनगर आणि अरफात शेख अतिक शेख, रा. देवानगरी यांना ताब्यात घेतले. न्यायालयाने दोन्ही आरोपींना दोन दिवसांची पोलीस कोठडी सुनावली.
चौकशीत आरोपींनी जवाहरनगर पोलीस ठाण्याच्या हद्दीतील उल्कानगरी येथील कृषी विभाग कार्यालयातून इन्व्हर्टर व बॅटरी चोरी केल्याची कबुली दिली. याप्रकरणी गुन्हा क्र. ३१५/२०२६ दाखल असून, अर्जुन केसरसिंग राजपूत, रा. शंभुनगर याचाही सहभाग असल्याचे तपासात निष्पन्न झाले. संबंधित मुद्देमाल पोलिसांनी जप्त केला.
तसेच सातारा पोलीस ठाण्याच्या हद्दीतील जैन शाळेजवळील लॉर्ड हॉल परिसरातून तांब्याची व पितळी भांडी चोरी केल्याची माहितीही आरोपींनी दिली. या प्रकरणी सातारा पोलीस ठाण्यात गुन्हा क्र. ५२५/२०२६ दाखल आहे. या गुन्ह्यात फरार व तडीपार आरोपी आमिर आयुब शेख, रा. इंदिरानगर, तसेच गंभीर गुन्हे दाखल असलेले शेख रिझवान शेख रहेमान आणि जाहेद बागवान, दोघेही रा. शंभुनगर, यांचा सहभाग असल्याची माहिती पोलिसांना मिळाली आहे.
दरम्यान, पुंडलिकनगर पोलीस ठाण्याच्या हद्दीतील राजेशनगर बायपास परिसरातील घरफोडीचा गुन्हाही आरोपींनी उघडकीस आणला. याप्रकरणी पुंडलिकनगर पोलीस ठाण्यात गुन्हा क्र. ३७०/२०२६ अन्वये गुन्हा दाखल आहे.
पोलिसांनी आरोपींचे गुन्हेगारी अभिलेख तपासले असता शेख आदिल याच्याविरुद्ध चोरी, घरफोडी व लुटमारीचे पाचपेक्षा अधिक गंभीर गुन्हे, तर फरार आरोपी आमिर आयुब शेख याच्याविरुद्ध दहापेक्षा अधिक गंभीर गुन्हे दाखल असल्याचे समोर आले आहे.
ही कारवाई पोलीस आयुक्त प्रविण पवार व वरिष्ठ पोलीस अधिकाऱ्यांच्या मार्गदर्शनाखाली पोलीस निरीक्षक सचिन कुंभार यांच्या नेतृत्वाखाली करण्यात आली. गुन्हे उघडकीस आणण्यासाठी PSI रावसाहेब वाघ, अनिल भाले, देगलूर, उपाध्याय, मारोती गोरे व राजू शिंदे यांनी विशेष कामगिरी बजावली.
दैनिक शब्दमत न्यूज नेटवर्क
