सिल्लोड तालुक्यात रेतीमाफियांची मुजोरी; धावत्या हायवातून तलाठ्याला ढकलले, थोडक्यात बचाव
दैनिक शब्दमत न्युज नेटवर्क
सिल्लोड (प्रतिनिधी) – तालुक्यात अवैध वाळूउत्खनन करणाऱ्या रेतीमाफियांची मुजोरी दिवसेंदिवस वाढत असल्याचे धक्कादायक प्रकरण समोर आले आहे. धावत्या हायवातून तलाठ्याला ढकलून देण्याची घटना घडली असून, या प्रकारात तलाठी बनसोडे हे थोडक्यात बचावले आहेत.
मिळालेल्या माहितीनुसार, सिल्लोड तालुक्यात अवैध वाळू वाहतुकीवर कारवाई करण्यासाठी तलाठी बनसोडे हे पथकासह तपासणी करत होते. यावेळी संशयित हायवा वाहन अडवून चौकशी सुरू असताना, वाहनचालकाने अचानक गाडी सुरू केली. त्यानंतर चालत्या हायवामधूनच तलाठी बनसोडे यांना जबरदस्तीने खाली ढकलण्यात आले.
या घटनेत बनसोडे हे हायवाच्या चाकाखाली येण्यापासून थोडक्यात बचावले. मात्र, या प्रकारामुळे प्रशासनात खळबळ उडाली असून, संबंधित रेतीमाफियांच्या धाडसाबद्दल संताप व्यक्त केला जात आहे.
घटनेनंतर संबंधित वाहनचालकाविरुद्ध गुन्हा दाखल करण्याची प्रक्रिया सुरू असून, पोलिसांनी तपास हाती घेतला आहे. तसेच, अवैध वाळूउत्खननाविरोधात अधिक कडक कारवाई करण्याची मागणी स्थानिक नागरिकांकडून होत आहे.
दरम्यान, या घटनेमुळे महसूल विभागाच्या कर्मचाऱ्यांच्या सुरक्षेचा प्रश्न ऐरणीवर आला असून, प्रशासनाने ठोस उपाययोजना करण्याची गरज व्यक्त होत आहे.
