स्वीकृत सदस्यांसाठी दोन्ही शिवसेनेत चुरस; प्रत्येकी एक जागा, इच्छुकांची गर्दी
छत्रपती संभाजीनगर : महापालिकेतील दहा स्वीकृत सदस्य (नगरसेवक) पदांसाठी अर्ज दाखल करण्याची मुदत ३० मार्च रोजी संपली असून, या निवडीसाठी राजकीय पक्षांमध्ये मोठी चुरस निर्माण झाली आहे. विशेषतः शिवसेना शिंदे गट आणि शिवसेना उबाठा (ठाकरे गट) यांच्या कोट्यातून प्रत्येकी केवळ एकच जागा उपलब्ध असताना दोन्ही गटांकडून १२ ते १५ इच्छुकांनी अर्ज दाखल केल्याने स्पर्धा तीव्र झाली आहे.
मनपातील स्वीकृत सदस्य पदांसाठी एकूण १० जागांसाठी सुमारे ८० अर्ज प्राप्त झाले आहेत. १ एप्रिल रोजी मनपा आयुक्तांच्या दालनात या अर्जांची छाननी करण्यात येणार असून, पात्र ठरलेल्या उमेदवारांची यादी तयार केली जाईल. त्यानंतर संबंधित पक्षांच्या वरिष्ठ पातळीवरून अंतिम नाव निश्चित केले जाणार आहे.
स्वीकृत सदस्य म्हणून सामान्यतः समाजसेवक, डॉक्टर, वकील, शिक्षणतज्ज्ञ, मुख्याध्यापक, सेवानिवृत्त आयएएस अधिकारी आदी विविध क्षेत्रातील मान्यवरांची निवड अपेक्षित असते. मात्र प्रत्यक्षात बहुतांश पक्षांकडून पदाधिकाऱ्यांनाच प्राधान्य दिले जात असल्याचे चित्र दिसून येते.
शिवसेना शिंदे गटाचे गटनेते किशोर नागरे यांनी सांगितले की, “इच्छुकांनी अर्ज भरावेत, अशी सर्वांना मोकळीक देण्यात आली होती. कोणालाही रोखण्यात आले नाही. छानणीनंतर पात्र उमेदवारांमधून एक नाव वरिष्ठ नेते अंतिम करतील.”
तर शिवसेना उबाठाचे गटनेते गणेश लोखंडे म्हणाले, “आमच्या पक्षाकडून १२-१५ इच्छुकांनी अर्ज दाखल केले आहेत. अद्याप कोणतेही नाव निश्चित झालेले नाही. छानणीनंतर पात्र उमेदवारांच्या नावांवर नेते अंबादास दानवे यांच्यासोबत चर्चा करून अंतिम निर्णय घेतला जाईल.”
दरम्यान, उबाठा गटाकडून राजेंद्र दानवे यांनी अर्ज दाखल केल्यामुळे त्या एका जागेसाठी त्यांची निवड निश्चित मानली जात असल्याची चर्चा राजकीय वर्तुळात रंगली आहे. त्यामुळे इतर इच्छुकांच्या आशा धूसर झाल्याचे चित्र आहे.
छानणीनंतर मनपा आयुक्तांकडून प्रस्ताव महापौरांकडे सादर केला जाईल. एप्रिलच्या दुसऱ्या आठवड्यात सर्वसाधारण सभा होण्याची शक्यता असून, या सभेत विविध पक्षांचे गटनेते स्वीकृत सदस्यांच्या नावांची यादी महापौरांकडे देतील. महापौर सभागृहात ही नावे जाहीर करून त्यांच्या निवडीची अधिकृत घोषणा करतील.
