महावितरणचा मनमानी कारभार उघड; हिना नगर मध्ये रमजान ईद दिवशी दिवसभर वीज गायब, नागरिक संतप्त
छ संभाजीनगर दैनिक शब्दमत न्युज नेटवर्क
शहरातील हिना नगर, पटेल नगर, सावित्री नगर (प्रभाग क्र. ९) या भागात महावितरण विभागाच्या भोंगळ व मनमानी कारभाराचा पर्दाफाश झाला आहे. रमजान ईदच्या दिवशीच दिवसभर वीजपुरवठा खंडित राहिल्याने नागरिकांमध्ये तीव्र संताप व्यक्त केला जात आहे.
स्थानिकांच्या मते, गेल्या अनेक दिवसांपासून या भागात वारंवार वीज खंडित होत असून महावितरण अधिकाऱ्यांकडून याकडे पूर्णतः दुर्लक्ष केले जात आहे. कार्यालयात संपर्क साधण्याचा प्रयत्न केला असता कर्मचारी फोन उचलत नसल्याचीही तक्रार नागरिकांनी केली आहे.
वीजपुरवठा खंडित राहिल्यामुळे परिसरातील छोटे-मोठे उद्योगधंदे ठप्प होण्याच्या मार्गावर आहेत. विद्यार्थ्यांना अभ्यासात अडथळे येत असून, जेष्ठ नागरिकांच्या आरोग्यावरही विपरीत परिणाम होत आहे. याशिवाय काही ठिकाणी वीजतारा लोंबकळत असल्याने अपघाताचा धोका निर्माण झाला आहे.
“आम्ही अजून किती दिवस हे सहन करायचे?” असा सवाल नागरिकांनी उपस्थित केला आहे. महावितरण विभागाच्या निष्काळजीपणामुळे नागरिकांचा संयम सुटत चालला असून, येत्या दोन दिवसांत वीजपुरवठा सुरळीत न झाल्यास रस्त्यावर उतरून आंदोलन करण्याचा इशारा नागरिकांनी दिला आहे.
या प्रकरणी महावितरण विभागाने तातडीने दखल घेऊन उपाययोजना करावी, अशी मागणी स्थानिकांकडून होत आहे.
