विधान परिषदेसाठी रविकांत राठोड यांच्या नावाची जोरदार चर्चा
छ संभाजीनगर प्रतिनिधी दैनिक शब्दमत न्युज नेटवर्क
छत्रपती संभाजीनगर : महाराष्ट्र विधान परिषदेच्या रिक्त झालेल्या जागेसाठी राष्ट्रवादी काँग्रेस पक्षात संभाव्य उमेदवारांच्या नावांवर जोरदार चर्चा सुरू झाली आहे. या चर्चेत पक्षाचे VJNT सेल प्रदेशाध्यक्ष तसेच बंजारा ब्रिगेडचे राष्ट्रीय अध्यक्ष रविकांत राठोड यांचे नाव सध्या आघाडीवर असल्याचे समजते.
विश्वसनीय सूत्रांच्या माहितीनुसार, पक्ष नेतृत्वाकडून यावेळी तळागाळातील कार्यकर्त्यांना संधी देण्याचा गंभीर विचार सुरू आहे. त्याच पार्श्वभूमीवर सर्वसामान्य कुटुंबातून पुढे आलेले, तरुण आणि तडफदार नेतृत्व म्हणून ओळख असलेले रविकांत राठोड यांना विशेष महत्त्व दिले जात असल्याचे बोलले जात आहे.
भटक्या-विमुक्त (VJNT) समाजाचे प्रतिनिधित्व वाढवण्याच्या दृष्टीनेही हा निर्णय महत्त्वाचा ठरू शकतो, अशी चर्चा राजकीय वर्तुळात रंगली आहे. जातीय समिकरणांचा विचार करता, अशा निर्णयामुळे राष्ट्रवादी काँग्रेस पक्षाच्या संघटनात्मक बळकटीत वाढ होण्याची शक्यता व्यक्त केली जात आहे.
दरम्यान, विधान परिषदेसाठी पक्षातील सुमारे आठ इच्छुक उमेदवारांची नावे चर्चेत असून, त्यामध्ये राठोड यांचे नाव आघाडीवर असल्याची माहिती मिळत आहे.
आता अंतिम निर्णय पक्षश्रेष्ठी कोणाच्या बाजूने घेतात, याकडे सर्वांचे लक्ष लागले आहे.
