पैठण तहसील कार्यालयातील भोंगळ कारभारामुळे शेतकरी हैराण; चौकशीची मागणी
दैनिक शब्दमत न्युज नेटवर्क | पैठण
खासदार संदिपान भुमरे यांच्या मतदारसंघातील पैठण तहसील कार्यालयामध्ये नायब तहसीलदार, मंडळाधिकारी व लिपिक यांच्या स्तरावर भोंगळ कारभार सुरू असल्याचा गंभीर आरोप समोर आला आहे. पैसे घेतल्याशिवाय शेतकऱ्यांची कामे होत नसल्याचा आरोप अर्जदाराने केला असून, यामुळे परिसरातील शेतकऱ्यांमध्ये तीव्र नाराजी पसरली आहे.
मिळालेल्या माहितीनुसार, संबंधित प्रकरण दीर्घ कालावधीपासून प्रलंबित असून, मा. तहसीलदार कार्यालयाकडून अद्याप कोणताही आदेश पारित करण्यात आलेला नाही. परिणामी, अर्जदारास मोठा मानसिक त्रास, आर्थिक नुकसान तसेच प्रशासकीय अन्याय सहन करावा लागत असल्याचे समोर आले आहे.
विशेष म्हणजे, नायब तहसीलदार श्री. प्रभाकर घुगे व लिपिक श्री. ज्ञानेश्वर अवचीत यांनी जाणूनबुजून विलंब केल्याचा आरोप अर्जदाराने केला आहे. त्यांच्या निष्क्रियतेमुळे संबंधित फेरफार प्रस्ताव प्रलंबित ठेवण्यात आल्याचा ठाम समज अर्जदार व्यक्त करत आहे.
या पार्श्वभूमीवर अर्जदाराने प्रशासनाकडे खालील मागण्या केल्या आहेतः
सदर प्रकरणाची तात्काळ सखोल चौकशी करण्यात यावी.
संबंधित अधिकारी व कर्मचाऱ्यांवर योग्य ती प्रशासकीय कारवाई करण्यात यावी.
प्रलंबित फेरफार प्रस्तावावर त्वरित निर्णय घेऊन आदेश पारित करण्यात यावा.
दरम्यान, या प्रकरणामुळे महसूल प्रशासनाच्या कार्यपद्धतीवर प्रश्नचिन्ह निर्माण झाले असून, वरिष्ठ अधिकाऱ्यांनी याकडे गांभीर्याने लक्ष देण्याची गरज व्यक्त होत आहे. आता प्रशासन यावर काय भूमिका घेते, याकडे सर्वांचे लक्ष लागले आहे.
