महानगरपालिका झोन ५ मधील कारभारावर नागरिकांचा संताप
प्रभारी अभियंता श्वेता एस. चोपडे यांच्या गैरहजेरीमुळे विकासकामे रखडली; आयुक्तांनी लक्ष देण्याची मागणी
दैनिक शब्दमत न्यूज नेटवर्क
छत्रपती संभाजीनगर : महानगरपालिकेच्या झोन क्रमांक ०५ कार्यालयातील प्रभारी अभियंता श्वेता एस. चोपडे या वारंवार गैरहजर राहत असल्याचा आरोप नागरिकांकडून करण्यात येत आहे. यामुळे नारेगाव, हिना नगर, पटेल नगर, सावित्री नगर, बिरवाडी आदी भागांतील अनेक विकासकामे रखडली असून नागरिकांना मोठा त्रास सहन करावा लागत आहे.
स्थानिक नागरिकांच्या म्हणण्यानुसार, रस्ते दुरुस्ती, गटार साफसफाई, पाणीपुरवठा तसेच इतर नागरी सुविधांबाबत वारंवार तक्रारी करूनही संबंधित कार्यालयातून कोणतीही ठोस कार्यवाही होत नाही. अनेक वेळा कार्यालयात भेट दिल्यानंतरही प्रभारी अभियंता उपलब्ध नसल्याने नागरिकांना हेलपाटे मारावे लागत आहेत.
विशेषतः पावसाळा तोंडावर असताना अनेक भागांतील मूलभूत कामे प्रलंबित असल्यामुळे नागरिकांमध्ये संतापाचे वातावरण निर्माण झाले आहे. रखडलेल्या कामांमुळे आरोग्य व स्वच्छतेचे प्रश्न गंभीर होण्याची शक्यता व्यक्त केली जात आहे.
झोन ०५ मधील ढिसाळ प्रशासनामुळे नागरिकांचे हाल होत असल्याचा आरोप करत महानगरपालिका आयुक्तांनी तात्काळ लक्ष घालून कारभाराची चौकशी करावी तसेच संबंधित अधिकाऱ्यांवर योग्य ती कारवाई करावी, अशी मागणी स्थानिक नागरिकांनी केली आहे.
