फर्दापूर पोलिसांचा धडक कारवाईचा बडगा; अवैध दारू व वाळू वाहतुकीवर मोठा प्रहार
दोन गुन्हे दाखल; ११ लाख २४ हजारांचा मुद्देमाल जप्त.
.. दैनिक शब्दमत न्युज नेटवर्क
सोयगाव / प्रतिनिधी यासीन बेग
…
सोयगाव तालुक्यातील फर्दापूर पोलिसांनी अवैध देशी दारू विक्री आणि बेकायदेशीर वाळू वाहतुकीविरोधात सलग दोन स्वतंत्र धडक कारवाया करत ११ लाख २४ हजार रुपयांचा मुद्देमाल जप्त केला आहे. या प्रकरणी दोन आरोपींविरुद्ध गुन्हे दाखल करण्यात आले असून, अवैध धंदे करणाऱ्यांमध्ये खळबळ उडाली आहे.
पोलिसांनी दिलेल्या माहितीनुसार, शनिवारी रात्री तोंडापूर फाटा परिसरात गस्तीदरम्यान एका संशयित वाहनाची तपासणी करण्यात आली. यावेळी विशाल विठ्ठल जोशी (रा. वाकोद, ता. जामनेर) याच्या ताब्यातील व्हॅगनार कारमध्ये टॅंगो पंच देशी दारूच्या २०० बाटल्या आढळून आल्या. पोलिसांनी दारूसह वाहन असा एकूण १ लाख ८ हजार रुपयांचा मुद्देमाल जप्त केला. याप्रकरणी पोलीस अमलदार फिरोज तडवी यांच्या फिर्यादीवरून गुन्हा दाखल करण्यात आला आहे.
त्यानंतर रविवारी पहाटे सोयगाव फाटा परिसरात गस्त घालत असताना पोलिसांना एक टिप्पर संशयास्पदरीत्या आढळला. चौकशी आणि तपासणीअंती सचिन पंढरीनाथ गवांडे (रा. पाथरी, ता. फुलंब्री) याच्या ताब्यातील टिप्परमध्ये विनापरवाना ४ ब्रास वाळूची वाहतूक केली जात असल्याचे उघड झाले. पोलिसांनी वाळूसह टिप्पर असा १० लाख १६ हजार रुपयांचा मुद्देमाल जप्त केला. या प्रकरणी पोलीस अमलदार राहुल नेवरे यांच्या फिर्यादीवरून गुन्हा दाखल करण्यात आला आहे.
दोन्ही कारवाया फर्दापूर पोलीस ठाण्याच्या पथकाने सहाय्यक पोलीस निरीक्षक सुधीर मोटे यांच्या मार्गदर्शनाखाली केल्या. या प्रकरणांचा पुढील तपास पोलीस नाईक निलेश लोखंडे करीत आहेत.
फर्दापूर पोलिसांच्या या धडक कारवाईमुळे अवैध दारू विक्री आणि वाळू माफियांना मोठा धक्का बसला असून, अशा बेकायदेशीर धंद्यांविरोधात पुढेही कठोर कारवाई सुरू राहणार असल्याचा इशारा पोलिसांनी दिला आहे.
