जवाहर कॉलनी आरोग्य केंद्रात राष्ट्रीय पल्स पोलिओ मोहिमेचा शुभारंभ
दैनिक शब्दमत न्युज नेटवर्क
छत्रपती संभाजीनगर, दि. 28 : राष्ट्रीय पल्स पोलिओ मोहिमेअंतर्गत जवाहर कॉलनी आरोग्य केंद्रात पोलिओ लसीकरण मोहिमेचा शुभारंभ उत्साहात करण्यात आला. वैद्यकीय अधिकारी डॉ. स्मिता कुलकर्णी यांच्या मार्गदर्शनाखाली प्रभाग क्र. 20 व 21 मध्ये एकूण 20 लसीकरण बूथ तसेच 2 मोबाईल पथकांच्या माध्यमातून ही मोहीम राबविण्यात आली.
जवाहर कॉलनी आरोग्य केंद्रात नगरसेवक सुरेंद्र कुलकर्णी, नंदलाल गवळी तसेच आरोग्य सभापती यांच्या हस्ते बालकांना पोलिओ लसीचे दोन थेंब पाजून मोहिमेचा शुभारंभ करण्यात आला. तसेच प्रभाग क्र. 20 मध्ये नगरसेवक त्र्यंबक तुपे यांच्या हस्तेही पोलिओ लसीकरण मोहिमेला प्रारंभ करण्यात आला.
यावेळी किशोर मानकापे, शंकर म्हात्रे, रामचंद्र बनारसे, आरोग्य निरीक्षक श्रीमती कडू-पवार, आरोग्य कर्मचारी ज्ञानेश्वर दोगे, जवाहर कॉलनी आरोग्य केंद्रातील कर्मचारी तसेच आशा सेविका उपस्थित होत्या.
मोहिमेदरम्यान उपस्थित पालकांना पोलिओ प्रतिबंधक लसीचे महत्त्व समजावून सांगण्यात आले. पाच वर्षांखालील प्रत्येक बालकाला पोलिओचे दोन थेंब पाजण्याचे आवाहन करण्यात आले. “दोन थेंब जीवनाचे – प्रत्येक बालकासाठी” हा संदेश देत सर्व बालकांचे लसीकरण करून देश पोलिओमुक्त ठेवण्यासाठी नागरिकांनी सहकार्य करावे, असे आवाहन आरोग्य विभागाच्या वतीने करण्यात आले.
