ना ठेकेदार, ना अभियंता, ना माहिती फलक… देव्हारीतील रस्ता काम नेमकं कोणाच्या भरवशावर*?
दैनिक शब्दमत न्युज नेटवर्क
सोयगाव / प्रतिनिधी यासीन बेग
छत्रपती संभाजी नगर* सोयगाव तालुक्यातील देव्हारी ग्रामपंचायत हद्दीत सुरू असलेल्या रस्त्याच्या कामामुळे नागरिकांमध्ये तीव्र नाराजी पसरली असून, कामाच्या पारदर्शकतेवर गंभीर प्रश्नचिन्ह उपस्थित झाले आहे. कामाच्या ठिकाणी ना ठेकेदार दिसत आहे, ना संबंधित अभियंता उपस्थित असल्याचा ग्रामस्थांचा दावा आहे. विशेष म्हणजे, काम कोणत्या योजनेतून किंवा कोणत्या निधीतून सुरू आहे, याची माहिती देणारा अनिवार्य फलकही लावण्यात आलेला नसल्याचे नागरिकांचे म्हणणे आहे.
ग्रामस्थांच्या म्हणण्यानुसार, कामाची एकूण किंमत किती आहे, मंजूर अंदाजपत्रक काय आहे, ठेकेदार कोण आहे, संबंधित विभाग कोणता आहे आणि कामाचा कालावधी किती आहे, याची कोणतीही माहिती नागरिकांना उपलब्ध नाही. त्यामुळे हे काम नेमके कोणाच्या देखरेखीखाली सुरू आहे, असा सवाल उपस्थित होत आहे.
स्थानिक नागरिकांचा आरोप आहे की, रस्त्याच्या कामात दर्जाबाबतही अनेक शंका निर्माण झाल्या आहेत. संबंधित अभियंत्याने नियमितपणे कामाची पाहणी करून गुणवत्ता तपासणे अपेक्षित असताना, प्रत्यक्षात अशी पाहणी होत नसल्याचा दावा ग्रामस्थांनी केला आहे.
या पार्श्वभूमीवर संबंधित विभागाने तातडीने घटनास्थळी भेट देऊन कामाची तांत्रिक तपासणी करावी, मंजूर अंदाजपत्रक व निधीची माहिती सार्वजनिक करावी, माहिती फलक त्वरित उभारावा आणि काम नियमांनुसार होत आहे की नाही, याबाबत नागरिकांसमोर वस्तुस्थिती स्पष्ट करावी, अशी जोरदार मागणी ग्रामस्थांनी केली आहे.
दरम्यान, या प्रकरणाबाबत संबंधित ठेकेदार, अभियंता किंवा संबंधित विभागाची अधिकृत प्रतिक्रिया मिळू शकलेली नाही. त्यांची बाजू प्राप्त झाल्यानंतर तीही प्रसिद्ध करण्यात येईल.
