राजाबाजार–जिन्सी रस्ता रुंदीकरण रखडले; उर्वरित ७ मालमत्ताधारकांना मोबदला देऊन काम पूर्ण करण्याची मागणी
दैनिक शब्दमत न्युज नेटवर्क छ संभाजीनगर
राजाबाजार ते जिन्सी परिसरातील २०१७ पासून प्रलंबित असलेल्या रस्ता रुंदीकरण व भूसंपादन प्रक्रियेला गती देण्याची मागणी अन्याय, अत्याचार, भ्रष्टाचार विरोधी समितीने महापालिका आयुक्तांकडे निवेदनाद्वारे केली आहे.
समितीचे जिल्हा सचिव फेरोज खान गफार खान पठाण यांनी दिलेल्या निवेदनानुसार, रस्ता रुंदीकरणासाठी सुमारे १५० मालमत्तांचे भूसंपादन करण्यात आले होते. त्यापैकी १४३ मालमत्ताधारकांना मोबदला देण्यात आला असून त्यांची प्रकरणे निकाली काढण्यात आली आहेत. मात्र, उर्वरित ७ मालमत्ताधारकांना अद्याप मोबदला मिळालेला नसल्याने त्यांचे भूसंपादन रखडले आहे.
सध्या या रस्त्याचे काम सुरू असले तरी उर्वरित मालमत्तांमुळे कामात अडथळे निर्माण होत आहेत. त्यामुळे नागरिकांना वाहतूक कोंडी, धूळ, खड्डे आणि गैरसोयींचा मोठा सामना करावा लागत असल्याचे निवेदनात नमूद करण्यात आले आहे.
समितीने महापालिका प्रशासनाला उर्वरित सात मालमत्ताधारकांना तातडीने योग्य मोबदला देऊन भूसंपादनाची प्रक्रिया पूर्ण करावी आणि रस्ता रुंदीकरणाचे काम लवकरात लवकर पूर्ण करून नागरिकांना दिलासा द्यावा, अशी मागणी केली आहे.
यासंदर्भात निवेदनाची प्रत उपसंचालक, नगररचना विभाग, महानगरपालिका, छत्रपती संभाजीनगर यांनाही देण्यात आली आहे.
