जिल्हा क्रीडा अधिकारी यांच्या अध्यक्षतेखाली तालुका क्रीडा स्पर्धांचे नियोजन
दैनिक शब्दमत न्युज नेटवर्क
सोयगाव / प्रतिनिधी यासीन बेग
सोयगाव, सोयगाव तालुका क्रीडा स्पर्धा २०२६–२०२७ च्या यशस्वी आयोजनासाठी नियोजन बैठक जिल्हा क्रीडा अधिकारी श्री. मुकुंद वाडकर यांच्या अध्यक्षतेखाली उत्साहात पार पडली. या बैठकीस संत ज्ञानेश्वर महाविद्यालय, सोयगाव येथील प्राचार्य डॉ. शिरीष पवार व उपप्राचार्य डॉ. रावसाहेब बारोटे हे प्रमुख पाहुणे म्हणून उपस्थित होते.
बैठकीत तालुकास्तरीय क्रीडा स्पर्धांचे वेळापत्रक, आयोजनाची रूपरेषा, स्पर्धा सुरळीत व शिस्तबद्ध पद्धतीने पार पाडण्यासाठी आवश्यक नियोजन तसेच विविध शाळा व महाविद्यालयांच्या जबाबदाऱ्यांबाबत सविस्तर चर्चा करण्यात आली.
यावेळी तालुका क्रीडा संयोजक तथा क्रीडा विभाग प्रमुख डॉ. निलेश गाडेकर यांनी सन २०२६–२०२७ मधील तालुका क्रीडा स्पर्धांचे सविस्तर नियोजन उपस्थितांसमोर मांडले. त्यांनी स्पर्धा पारदर्शक, दर्जेदार व खेळाडूकेंद्रित पद्धतीने पार पाडण्यासाठी आवश्यक सूचना दिल्या.
नुकतीच जिल्हा क्रीडा अधिकारीपदी नियुक्ती झाल्याबद्दल श्री. मुकुंद वाडकर यांचा संत ज्ञानेश्वर महाविद्यालयाच्या वतीने शाल व श्रीफळ देऊन सत्कार करण्यात आला. तसेच क्रीडा अधिकारी श्री. यादव यांचेही पुष्पगुच्छ देऊन स्वागत करण्यात आले.
याचप्रसंगी तालुक्यातील सर्व क्रीडा शिक्षकांच्या वतीने श्री. गोबरा राठोड यांनी जिल्हा क्रीडा अधिकारी श्री. मुकुंद वाडकर यांचा शाल व श्रीफळ देऊन सत्कार करून शुभेच्छा दिल्या.
बैठकीस तालुक्यातील विविध शाळा व महाविद्यालयांचे क्रीडा शिक्षक, प्रतिनिधी व क्रीडाप्रेमी मोठ्या संख्येने उपस्थित होते. उपस्थित मान्यवरांनी तालुक्यातील क्रीडा चळवळ अधिक बळकट करण्यासाठी सर्वांनी समन्वयाने कार्य करण्याचे आवाहन केले.
