घरकुल दालनाला कुलूप, लाभार्थी दरवाजात
पंचायत समितीतील बेजबाबदार कारभारामुळे गोरगरीब हैराण
दैनिक शब्दमत न्युज नेटवर्क
जाफराबाद प्रतिनिधी : मोहम्मद बाईयाश
जाफ्राबाद पंचायत समितीच्या कार्यालयात घरकुल विभागाच्या दालनाला कुलुप बंद दरवाजा बघून लाभार्थ्यांना हेलपाटे बसत आहे..
गोरगरीबांना हक्काचे घर मिळवून देणाऱ्या घरकुल योजनेचे दालनच कुलूपबंद. लाभार्थी हप्त्यासाठी, माहितीसाठी दिवसभर चकरा मारत आहेत. पण पंचायत समितीतील संबंधित कर्मचारी मात्र कार्यालयात दिसत नाहीत. जाफ्राबाद पंचायत समितीतील हा बेजबाबदार कारभार सध्या चर्चेचा विषय बनला आहे.
*दररोजची हीच अवस्था*
पंचायत समिती आवारातील घरकुल दालन गेल्या अनेक दिवसांपासून बंद अवस्थेत आहे. सकाळी 10 वाजल्यापासून ते संध्याकाळी 5 वाजेपर्यंत लाभार्थी येतात. मात्र दालनाला कुलूप असल्याने त्यांना रिकाम्या हाताने परत जावे लागत आहे.
जाफ्राबाद तालुक्यातील विविध गावांमधून 30-40 किलोमीटरचा प्रवास करून आले वृद्ध, महिला आणि मजूर तासनतास दालनासमोर बसून राहतात. अखेर कर्मचारी येणार नाही हे लक्षात आल्यावर निराशेने घरी परततात.
*हप्ते रखडले, बांधकाम अर्धवट*
अनेक लाभार्थ्यांच्या घरकुलाचे दुसरे आणि तिसरे हप्ते रखडले आहेत. पावसाळा तोंडावर आला आहे. अर्धवट घरात राहणे मुश्किल झाले आहे. वारंवार चकरा मारूनही काम होत नसल्याने लाभार्थी आक्रमक झाले आहेत.
“आम्ही मजुरी सोडून येतो. 200 रुपये खर्च करून येतो. पण इथे कोणीच नसते. आम्ही जायचे कुठे” असे संतप्त उद्गार एका लाभार्थी महिलेने काढले.
*जबाबदार कोण*
घरकुल योजना केंद्र आणि राज्य सरकारची महत्वाकांक्षी योजना आहे. पण त्याची अंमलबजावणी करणाऱ्या यंत्रणेचाच पत्ता नसल्याने या योजनेचा उद्देशच फोल ठरत आहे.
लाभार्थ्यांनी गटविकास अधिकारी यांच्याकडे तातडीने लक्ष घालून घरकुल दालनातील कर्मचाऱ्यांची उपस्थिती शंभर टक्के करण्याची मागणी केली आहे. तसेच दररोजच्या उपस्थितीचा फलक दालनाबाहेर लावावा अशी मागणीही होत आहे.
सरकार घरे देते आहे. पण ती घरे मिळवून देणारी यंत्रणाच झोपली असेल तर गोरगरीबांचे स्वप्न पूर्ण होणार कसे, असा सवाल आता लाभार्थी विचारत आहेत.
