सोयगाव : दमदार पावसाने सोनानदीला महापूर; वेतालवाडी तलाव ओव्हरफ्लो
सोयगाव / प्रतिनिधी यासीन बेग
सोयगाव, दि. ३० जुलै : सोयगाव परिसरात गुरुवारी झालेल्या दमदार पावसामुळे जनजीवनावर परिणाम झाला. मुसळधार पावसामुळे सोना नदीला महापूर आला असून नदी दुथडी भरून वाहत आहे. नदीकाठच्या नागरिकांना सतर्क राहण्याचे आवाहन प्रशासनाकडून करण्यात आले आहे.
दरम्यान, सततच्या पावसामुळे वेतालवाडी तलाव पूर्ण क्षमतेने भरला असून तलावाच्या सांडव्यातून मोठ्या प्रमाणात पाणी वाहू लागले आहे. त्यामुळे परिसरातील शेतकरी आणि नागरिकांमध्ये समाधानाचे वातावरण असले तरी नदीकाठच्या व सखल भागातील नागरिकांनी आवश्यक ती खबरदारी घ्यावी, असे आवाहन करण्यात आले आहे.
पावसामुळे परिसरातील ओढे-नालेही तुडुंब भरून वाहत असून अनेक ठिकाणी पाण्याचा प्रवाह वाढला आहे. प्रशासन परिस्थितीवर लक्ष ठेवून असून नागरिकांनी विनाकारण पूरग्रस्त भागात जाणे टाळावे, असे आवाहन करण्यात आले आहे.
