बंगालच्या उपसागरात घोंगावतेय चक्रीवादळ; आंध्र, ओडिशासह अनेक राज्यांना अतिमुसळधार पावसाचा इशारा

बंगालच्या उपसागरात घोंगावतेय चक्रीवादळ; आंध्र, ओडिशासह अनेक राज्यांना अतिमुसळधार पावसाचा इशारा
विशेष वृत्त / दैनिक शब्दमत
नवी दिल्ली / विशाखापट्टणम:
बंगालच्या उपसागरात निर्माण झालेला कमी दाबाचा पट्टा वेगाने तीव्र होत असून पुढील १२ तासांत त्याचे ‘डीप डिप्रेशन’मध्ये (तीव्र कमी दाबाच्या पट्ट्यात) रूपांतर होण्याची शक्यता भारतीय हवामान विभागाने (IMD) वर्तवली आहे. या हवामान प्रणालीमुळे देशातील अनेक राज्यांमध्ये मुसळधार ते अतिमुसळधार पावसाचा धोका निर्माण झाला असून २४ सप्टेंबरपर्यंत तीव्र इशारा देण्यात आला आहे.
‘अर्णब’ चक्रीवादळाचा धोका?
हवामान तज्ज्ञांच्या मते, प्रशांत महासागरात ‘अल निनो’ सक्रिय आहे, तर बंगालच्या उपसागरातील ही हवामान प्रणाली अधिक तीव्र होऊन तिचे चक्रीवादळात रूपांतर होऊ शकते. जर या प्रणालीचे वादळात रूपांतर झाले, तर या वर्षातील या पहिल्या चक्रीवादळाला ‘अर्णब’ असे नाव दिले जाईल.
किनारपट्टीवर कधी धडकणार?
हवामान विभागाच्या माहितीनुसार, मंगळवारी सकाळी ८:३० वाजेच्या सुमारास ही प्रणाली ओडिशातील गोपाळपूरपासून सुमारे २०० किमी आणि विशाखापट्टणमपासून २९० किमी अंतरावर केंद्रित होती. ही यंत्रणा २३ सप्टेंबरच्या रात्रीपासून २४ सप्टेंबरच्या पहाटेदरम्यान उत्तर आंध्र प्रदेश आणि दक्षिण ओडिशाच्या किनारपट्टीवरील विशाखापट्टणम व गोपाळपूरदरम्यान ‘डीप डिप्रेशन’च्या रूपात ओलांडण्याची दाट शक्यता आहे.
‘या’ राज्यांना बसणार जोरदार फटका:
* ओडिशा: २२ ते २४ सप्टेंबर दरम्यान अनेक भागांत अतिमुसळधार पावसाची शक्यता आहे.
* आंध्र प्रदेश: २२ आणि २३ सप्टेंबर रोजी किनारी भागात मुसळधार ते अतिमुसळधार पाऊस पडू शकतो.
* छत्तीसगड आणि तेलंगणा: २३ आणि २४ सप्टेंबर रोजी जोरदार पावसाचा इशारा देण्यात आला आहे.
प्रशासनाकडून सतर्कतेचा इशारा
पावसामुळे सखल भागात पाणी साचण्याची आणि स्थानिक पातळीवर पूरस्थिती निर्माण होण्याची भीती आहे. त्यामुळे हवामान विभागाने नागरिकांना ताजी अपडेट्स पाहण्याचे आणि स्थानिक प्रशासनाच्या सूचनांचे पालन करण्याचे आवाहन केले आहे. मच्छिमारांना देखील समुद्रात न जाण्याचा सल्ला देण्यात आला आहे.