वीजपुरवठा सुरू होण्याआधीच विद्युत खांब कोसळले; नागरिकांकडून संताप व्यक्त
दैनिक शब्दमत न्युज नेटवर्क
जाफराबाद प्रतिनिधी : मोहम्मद बाईयाश
जाफराबाद तालुक्यातील कुंभारझरी फाटा ते डोलखेडा रस्त्यावर वीजपुरवठा सुरू होण्याआधीच विद्युत खांब कोसळल्याची धक्कादायक घटना समोर आली आहे. या प्रकारामुळे महावितरणच्या कामकाजावर प्रश्नचिन्ह उपस्थित होत असून नागरिकांनी तीव्र नाराजी व्यक्त केली आहे.
माहितीनुसार, सुमारे महिनाभरापूर्वी वीज वितरण कंपनीमार्फत संबंधित भागात नवीन विद्युत खांब उभारण्याचे व तार ओढण्याचे काम ठेकेदाराकडून करण्यात आले होते. मात्र, हे खांब रस्त्यालगतच्या मोकळ्या व सैल मातीत रोवण्यात आल्याने ते मजबूत आधार न मिळाल्यामुळे कोसळल्याचा आरोप स्थानिक नागरिकांनी केला आहे.
स्थानिकांच्या म्हणण्यानुसार, अनेक ठिकाणी खांब सरळ रेषेत उभारण्यात आलेले नाहीत. तसेच आवश्यक त्या ठिकाणी ताण (सपोर्ट) न दिल्याने संपूर्ण लाईनची स्थिरता धोक्यात आली आहे. त्यामुळे संबंधित कामाच्या गुणवत्तेबाबत गंभीर प्रश्न निर्माण झाले आहेत.
परिसरात दोन दिवसांपूर्वी वादळी वाऱ्यासह पाऊस झाला होता. या वादळी हवामानामुळेच कमकुवत पायाभरणी असलेले खांब कोसळल्याचे स्थानिक नागरिक योगेश बंगाळे यांनी सांगितले.
सुदैवाने या घटनेत कोणतीही जीवितहानी झाली नसली तरी रस्त्यावरील प्रवाशांच्या सुरक्षिततेचा प्रश्न निर्माण झाला आहे. कोसळलेले विद्युत खांब तात्काळ उभे करून कामाची चौकशी करावी व दोषींवर कारवाई करावी, अशी मागणी परिसरातील नागरिक आणि प्रवाशांकडून करण्यात येत आहे.
