अवैध धंद्यांच्या विरोधात टेंभुर्णी पोलीस ‘ॲक्शन मोड’वर! खबरदार… अवैध धंदे कराल तर खावी लागेल जेलची हवा!
दैनिक शब्दमत न्युज नेटवर्क
जाफराबाद प्रतिनिधि : मोहम्मद बाईयाश
टेंभुर्णी परिसर आणि आसपासच्या ग्रामीण भागात बेकायदेशीर व्यवसाय करणाऱ्यांचे धाबे दणाणले आहेत. अवैध धंद्यांचे समूळ उच्चाटन करण्यासाठी टेंभुर्णी पोलीस ठाणे आता पूर्णपणे ‘ॲक्शन मोड’वर आले असून, अवैध दारू विक्री, मटका, जुगार आणि अवैध वाहतूक करणाऱ्यांना थेट कारवाईचा इशारा देण्यात आला आहे. “कायदा आणि सुव्यवस्था अबाधित राखण्यासाठी अवैध धंदे गप्पपणे खपवून घेतले जाणार नाहीत. नियम मोडल्यास थेट जेलची हवा खावी लागेल,” असा कडक सज्जड दमच पोलीस प्रशासनाने दिला आहे.
गेल्या काही दिवसांपासून परिसरात अवैध धंद्यांनी डोके वर काढल्याच्या तक्रारी नागरिकांमधून प्राप्त होत होत्या. याची गंभीर दखल घेत पोलीस निरीक्षक अविनाश राठोड यांच्या मार्गदर्शनाखाली आणि फौजदार बाबासाहेब खार्डे यांच्या नेतृत्वाखाली विशेष मोहीम हाती घेण्यात आली आहे. पोलिसांच्या या आक्रमक भूमिकेमुळे गुन्हेगारी जगतात आणि अवैध व्यावसायिकांमध्ये मोठी खळबळ उडाली आहे.
पोलिसांची ‘आयरन हँड’ कारवाई; गस्त
वाढवली.
————————————————
टेंभुर्णी पोलीस ठाण्याच्या हद्दीतील संशयित ठिकाणे, ढाबे आणि आडमार्गांवरील ठिकाणी पोलिसांचे विशेष पथक बारकाईने लक्ष ठेवून आहे. रात्रीची गस्त आणि अचानक टाळल्या जाणाऱ्या धाडींचे प्रमाण वाढवण्यात आले आहे. गावातील शांतता व सुव्यवस्था बिघडवणाऱ्या कोणत्याही घटकाला पाठीशी घातले जाणार नाही, असा स्पष्ट संदेश या कारवाईतून देण्यात आला आहे.
“शांतता आणि सुव्यवस्थेशी तडजोड नाही!”
“टेंभुर्णी पोलीस ठाण्याच्या हद्दीत कोणताही अवैध व्यवसाय चालू दिला जाणार नाही. नागरिकांचे आरोग्य, कौटुंबिक शांतता आणि तरुण पिढीचे भवितव्य उद्ध्वस्त करणाऱ्या अवैध व्यावसायिकांवर अत्यंत कठोर कायदेशीर कारवाई केली जाईल. अवैध धंदे करणाऱ्यांनी तातडीने आपले काळे धंदे बंद करावेत, अन्यथा कडक कारवाईला सामोरे जाण्यास तयार राहावे.”
— अविनाश राठोड, पोलीस निरीक्षक टेंभुर्णी
“गुन्हेगारांची खैर नाही, नागरिकांनी सहकार्य करावे!”
> “आम्ही हद्दीतील सर्व गुप्त माहिती मिळवण्याचे जाळे मजबूत केले आहे. कुठेही अवैध दारू विक्री, जुगार किंवा इतर बेकायदेशीर प्रकार सुरू असल्याचे आढळल्यास तात्काळ पोलीस ठाण्याशी संपर्क साधावा. बातमीदाराचे नाव पूर्णपणे गुप्त ठेवले जाईल. कायदा हातात घेणाऱ्यांची आणि बेकायदेशीर धंदे चालवणाऱ्यांची अजिबात गय केली जाणार नाही.”
— बाबासाहेब खार्डे, फौजदार टेंभुर्णी
नागरिकांमधून पोलिसांच्या कारवाईचे स्वागत
टेंभुर्णी पोलिसांच्या या आक्रमक आणि धडक भूमिकेमुळे सर्वसामान्य नागरिक, महिला आणि ज्येष्ठांमधून समाधान व्यक्त केले जात आहे. वाढत्या गुन्हेगारीला आणि अवैध धंद्यांना चाप बसल्यामुळे परिसरातील शांतता टिकून राहण्यास मदत होईल, अशी अपेक्षा
ग्रामस्थ व्यक्त करत आहेत.
