खास गेटचा इतिहास पुसला; मोकळ्या जागेवर बेकायदेशीर चक्क मोठी इमारत बांधली
दैनिक शब्दमत न्युज नेटवर्क
छत्रपती संभाजीनगर, प्रतिनिधी — शहरातील जिंसी परिसरात एकेकाळी ऐतिहासिक ओळख असलेला ‘खास गेट’ हा दरवाजा आज पूर्णपणे नामशेष झाल्याचे धक्कादायक वास्तव समोर आले आहे. जीर्ण अवस्थेमुळे महानगरपालिकेने या परिसरातील जागा संपादित केली होती; मात्र त्यानंतर योग्य नियोजनाऐवजी अतिक्रमणाला खतपाणी घातल्याचा आरोप स्थानिक नागरिकांकडून केला जात आहे.
महानगरपालिकेच्या ताब्यात आलेल्या या मोकळ्या जागेवर काही अज्ञात व्यक्तींनी बेकायदेशीररित्या मोठे गोदाम उभारल्याचे उघड झाले आहे. प्रशासनाच्या निष्क्रियतेमुळे हे अतिक्रमण दिवसेंदिवस वाढत गेले, अशी संतप्त प्रतिक्रिया नागरिक व्यक्त करत आहेत.
विशेष म्हणजे, शहराच्या ऐतिहासिक वारशाचे प्रतीक असलेला ‘खास गेट’ आज पूर्णतः अदृश्य झाला असून, त्याचा कोणताही ठसा उरलेला नाही. त्यामुळे शहराच्या सांस्कृतिक ओळखीवरच गदा आल्याची भावना व्यक्त होत आहे.
स्थानिकांच्या मते, प्रशासनाने वेळेत पावले उचलली असती तर हा ऐतिहासिक ठेवा जपता आला असता. मात्र अधिकाऱ्यांच्या उदासीनतेमुळे अतिक्रमण करणाऱ्यांचे मनोबल वाढले असून सार्वजनिक जागेचा सर्रास गैरवापर होत आहे.
दरम्यान, या संपूर्ण प्रकरणाची सखोल चौकशी करून संबंधितांवर कठोर कारवाई करावी, तसेच जागेचे मूळ स्वरूप पुनर्स्थापित करून ‘खास गेट’चा ऐतिहासिक वारसा जतन करावा, अशी जोरदार मागणी नागरिकांकडून होत आहे. आता महानगरपालिका प्रशासन या प्रकरणी काय भूमिका घेणार, याकडे सर्वांचे लक्ष लागले आहे.
