जालना लघु पाटबंधारे विभागाच्या सात निविदांमध्ये गैरव्यवहाराचा संशय
दैनिक शब्दमत न्युज नेटवर्क
आमदार अंबादास दानवे यांची मुख्यमंत्र्यांकडे उच्चस्तरीय चौकशीची मागणी
मुंबई, दि. ५ जून : जालना जिल्ह्यातील लघु पाटबंधारे विभागामार्फत पूर संरक्षण भिंतींच्या बांधकामासाठी काढण्यात आलेल्या सात निविदांमध्ये गैरव्यवहार झाल्याचा गंभीर आरोप करत आमदार Ambadas Danve यांनी राज्याच्या मुख्यमंत्र्यांकडे उच्चस्तरीय चौकशीची मागणी केली आहे.
दानवे यांनी दिलेल्या माहितीनुसार, २३ मार्च २०२६ रोजी घनसावंगी व अंबड तालुक्यातील सात ठिकाणांच्या कामांसाठी सुमारे ८५.५० लाख रुपयांच्या निविदा प्रसिद्ध करण्यात आल्या होत्या. या सर्व निविदांमध्ये केवळ चार कंत्राटदारांनी सहभाग नोंदविला. मात्र तांत्रिक मूल्यमापनादरम्यान दोन कंत्राटदार सातही निविदांमध्ये अपात्र ठरले, तर उर्वरित दोनपैकी एका कंत्राटदाराला सर्व सात कामांचे कंत्राट मिळाल्याचे समोर आले आहे.
सातही निविदांमध्ये एकसारखीच परिस्थिती निर्माण झाल्याने निविदा प्रक्रियेच्या पारदर्शकतेबाबत प्रश्नचिन्ह उपस्थित होत असल्याचे दानवे यांनी म्हटले आहे. तसेच कंत्राटदारांमधील संगनमत, दिखाऊ स्पर्धा आणि निविदा प्रक्रियेत हेतुपुरस्सर हस्तक्षेप झाल्याचा संशयही त्यांनी व्यक्त केला आहे.
या प्रकरणाची स्वतंत्र व उच्चस्तरीय चौकशी करून संपूर्ण निविदा प्रक्रिया, तांत्रिक मूल्यमापन, अपात्रतेची कारणे आणि अंतिम कार्यादेश मंजुरीची तपासणी करण्यात यावी, अशी मागणी दानवे यांनी केली आहे. चौकशीत दोषी आढळणाऱ्या अधिकारी, कर्मचारी व कंत्राटदारांवर कठोर कारवाई करण्याची मागणीही त्यांनी मुख्यमंत्र्यांकडे पत्राद्वारे केली आहे.
