पहिल्याच पावसात स्मार्ट सिटीच्या कामांची पोलखोल; अर्धवट ड्रेनेज लाईनमुळे नागरिक त्रस्त टाऊन हॉल येथील घटना
छत्रपती संभाजीनगर | दैनिक शब्दमत न्यूज नेटवर्क
छत्रपती संभाजीनगर महानगरपालिकेकडून शहरात विविध भागांमध्ये ड्रेनेज लाईन व पायाभूत सुविधांची कामे सुरू असताना संबंधित कामांची गुणवत्ता आणि नियोजनावर प्रश्नचिन्ह निर्माण झाले आहे. पहिल्याच पावसात अनेक ठिकाणी रस्ते उखडले असून, अर्धवट अवस्थेत सोडलेल्या ड्रेनेज लाईनच्या कामांमुळे नागरिकांना मोठ्या गैरसोयींचा सामना करावा लागत आहे.
शहरातील काही भागांमध्ये ड्रेनेज लाईन टाकण्यासाठी रस्ते खोदण्यात आले; मात्र काम पूर्ण न करता खड्डे तसेच सोडण्यात आल्याने पावसाचे पाणी साचले आहे. परिणामी वाहनचालकांसह पादचाऱ्यांना जीव मुठीत धरून मार्गक्रमण करावे लागत आहे. अनेक ठिकाणी चेंबरच्या आजूबाजूचा भाग खचला असून रस्त्यावर मोठमोठे खड्डे पडले आहेत.
स्थानिक नागरिकांच्या म्हणण्यानुसार, संबंधित विभागाकडून काम पूर्ण झाल्यानंतर रस्त्यांची योग्य दुरुस्ती करण्यात आलेली नाही. पावसामुळे चिखल, पाणी आणि खड्ड्यांचे साम्राज्य निर्माण झाले असून वाहनांचे नुकसान होण्याबरोबरच अपघाताचा धोका वाढला आहे. काही वाहनचालकांची वाहने खड्ड्यांमध्ये अडकण्याच्या घटनाही घडल्या आहेत.
नागरिकांनी महानगरपालिका प्रशासनाने तातडीने या अर्धवट कामांची दखल घेऊन रस्त्यांची दुरुस्ती करावी, पाण्याचा निचरा सुरळीत करावा आणि संबंधित ठेकेदारांची चौकशी करावी, अशी मागणी केली आहे.
पहिल्याच पावसात उघड झालेल्या या स्थितीमुळे महानगरपालिकेच्या विकासकामांच्या गुणवत्तेबाबत नागरिकांमध्ये तीव्र नाराजी व्यक्त होत आहे. शहरवासीयांना दिलासा देण्यासाठी प्रशासनाने तात्काळ उपाययोजना करणे आवश्यक असल्याची भावना नागरिकांकडून व्यक्त होत आहे.
