मूल्यवर्धन शिक्षण ही काळाची गरज; फक्त डिग्री नव्हे तर कौशल्यही आवश्यक – तालुका समन्वयक एम. के. नाईक
….
जय कालिंका देवी शिक्षण प्रसारक संस्थेच्या शिवाजी माध्यमिक व उच्च माध्यमिक विद्यालयात विद्यार्थ्यांना मूल्यवर्धन शिक्षणाचे मार्गदर्शन
दैनिक शब्दमत न्युज नेटवर्क
सोयगाव / प्रतिनिधी यासीन बेग
जय कालिंका देवी शिक्षण प्रसारक संस्था संचलित शिवाजी माध्यमिक व उच्च माध्यमिक विद्यालयात इयत्ता पाचवी ते आठवीच्या विद्यार्थ्यांसाठी मूल्यवर्धन शिक्षण विषयावर मार्गदर्शन कार्यक्रम आयोजित करण्यात आला. यावेळी सोयगाव तालुका मूल्यवर्धन समन्वयक एम. के. नाईक यांनी विद्यार्थ्यांना मार्गदर्शन करताना, “आजच्या स्पर्धात्मक युगात केवळ पदवी मिळवून चालणार नाही, तर व्यावहारिक कौशल्ये, नैतिक मूल्ये आणि व्यक्तिमत्त्व विकासही तितकाच महत्त्वाचा आहे,” असे प्रतिपादन केले.
नाईक यांनी विद्यार्थ्यांना संवाद कौशल्य, सांघिक कार्य, डिजिटल साक्षरता, समस्या सोडवण्याची क्षमता, वेळेचे नियोजन, नेतृत्वगुण, आर्थिक साक्षरता आणि सामाजिक जबाबदारी यांसारख्या जीवनोपयोगी कौशल्यांचे महत्त्व पटवून दिले. बदलत्या काळानुसार विद्यार्थ्यांनी पुस्तकी ज्ञानाबरोबरच कौशल्याधारित शिक्षण स्वीकारणे आवश्यक असल्याचे त्यांनी सांगितले.
यावेळी जीवन कोलते यांनी मूल्यवर्धन शिक्षणाची संकल्पना विद्यार्थ्यांना सोप्या व सहज भाषेत समजावून सांगितली. विद्यार्थ्यांनी आपल्या आवडी, क्षमता आणि कौशल्यांचा विकास करून भविष्यात सक्षम नागरिक बनावे, असे आवाहनही त्यांनी केले.
कार्यक्रमाला विकास पाटील, विजयसिंग राजपूत, ज्ञानेश्वर राठोड, पोपटराव सोनवणे, भूषण देसले, अमोल कोलते, मुकुंदा व्यवहारे, भास्कर खमाठ, सुदाम राठोड तसेच शिक्षकेतर कर्मचारी अजबराव चव्हाण, श्याम जाधव, बाबासाहेब कोलते, राहुल बडक, संदीप कोलते आदी उपस्थित होते.
कार्यक्रमाच्या शेवटी जीवन कोलते यांनी तालुका समन्वयक, शिक्षक, पालक आणि उपस्थित विद्यार्थ्यांचे आभार मानले.
