आम्ही लढू! आदिवासींचे अधिकार दैनिक शब्दमत विशेष वृत्तांत

—

४० वर्षांपासून मूलभूत सुविधांपासून वंचित; आडगाव बुं येथील आदिवासींची दयनीय अवस्था

दैनिक शब्दमत नु

छत्रपती संभाजीनगर (प्रतिनिधी):

तालुक्यातील आडगाव बुं येथे गेल्या तब्बल ४० वर्षांपासून वास्तव्यास असलेल्या आदिवासी समाजाची अवस्था अत्यंत बिकट झाली असून आजही त्यांना पाणी, शिक्षण आणि निवाऱ्यासारख्या मूलभूत सुविधांपासून वंचित राहावे लागत आहे.

स्थानिक आदिवासी नागरिकांनी दिलेल्या माहितीनुसार, ग्रामपंचायत तसेच लोकप्रतिनिधींना वारंवार निवेदने देऊनही त्यांच्या समस्यांकडे दुर्लक्ष केले जात आहे. गावात पिण्याच्या पाण्याची कोणतीही शाश्वत व्यवस्था नसल्याने महिलांना आणि नागरिकांना दररोज मैलोनमैल पाणी आणण्यासाठी भटकंती करावी लागत आहे.

शिक्षणाच्या बाबतीतही परिस्थिती चिंताजनक असून गावात शाळेची सुविधा उपलब्ध नसल्यामुळे अनेक मुलांचे शिक्षण अर्धवट राहिले आहे. परिणामी, नवीन पिढी अज्ञानाच्या अंधारात ढकलली जात असल्याचे चित्र आहे.

तसेच, निवाऱ्याचा प्रश्नही गंभीर बनला असून अनेक कुटुंबे आजही कच्च्या आणि असुरक्षित घरांमध्ये राहत आहेत. पावसाळ्यात या घरांमध्ये राहणे धोकादायक ठरत असल्याची माहिती नागरिकांनी दिली.

या सर्व परिस्थितीमुळे आदिवासी समाजात तीव्र संताप आणि नाराजी व्यक्त होत आहे. प्रशासनाने तात्काळ लक्ष देऊन पिण्याचे पाणी, शाळा व घरांची सुविधा उपलब्ध करून द्यावी, अशी मागणी जोर धरत आहे.

दरम्यान, जिल्हाधिकारी व तहसीलदार यांनी या गंभीर प्रश्नाची तातडीने दखल घेऊन प्रत्यक्ष पाहणी करून ठोस उपाययोजना कराव्यात, अशी अपेक्षा नागरिकांकडून व्यक्त होत आहे

दैनिक शब्दमत न्युज नेटवर्क महाराष्ट्र

आपल्या परिसरातील बातमी व्हाट्सअप वर पाठवा 9423056374