टेंडरच्या नावाखाली गोदापात्रात वाळू तस्करांचा धुमाकूळ
पैठण दैनिक शब्दमत न्युज नेटवर्क -शेख आनिस
पैठण प्रतिनिधी — पैठण तालुक्यातील पाटेगाव येथील गोदापात्रात टेंडरच्या नावाखाली वाळू तस्करांनी अक्षरशः हैदोस घातल्याचे चित्र समोर येत आहे. प्रशासनाने वाळू उपसा व वाहतुकीसाठी ठरवून दिलेल्या वेळेचे खुलेआम उल्लंघन होत असून, रात्री उशिरापर्यंत अवैधरित्या वाळू उपसा आणि वाहतूक सुरू असल्याची माहिती स्थानिकांकडून मिळत आहे.
नियमांनुसार वाळू उपसा व वाहतूक करण्यासाठी निश्चित वेळ व अटी घालून दिल्या असतानाही संबंधित ठेकेदारांकडून त्याचे पालन होत नसल्याचे दिसून येत आहे. रात्रीच्या अंधाराचा फायदा घेत मोठ्या प्रमाणावर जेसीबी आणि ट्रॅक्टरच्या सहाय्याने वाळू उपसा केला जात असून, नदीपात्राचे मोठ्या प्रमाणावर नुकसान होत आहे.
स्थानिक नागरिकांनी सांगितले की, सतत सुरू असलेल्या या अवैध उपशामुळे परिसरातील पर्यावरणीय समतोल बिघडण्याची भीती निर्माण झाली आहे. तसेच रात्रभर सुरू असलेल्या वाहनांच्या आवाजामुळे ग्रामस्थांच्या शांततेतही व्यत्यय येत आहे.
या प्रकाराकडे संबंधित महसूल व पोलिस प्रशासनाने दुर्लक्ष केल्याचा आरोपही नागरिकांकडून करण्यात येत आहे. अनेक वेळा तक्रारी करूनही कोणतीही ठोस कारवाई होत नसल्याने नागरिकांमध्ये नाराजीचे वातावरण आहे.
दरम्यान, या संपूर्ण प्रकाराची चौकशी करून नियमांचे उल्लंघन करणाऱ्यांवर कठोर कारवाई करावी, अशी मागणी स्थानिक नागरिकांकडून जोर धरत आहे.
