एमपीएससी परीक्षा ऑफलाइनच घ्याव्यात; स्पर्धा परीक्षा विद्यार्थ्यांचे विभागीय आयुक्त कार्यालया समोर मोठं आंदोलन
छत्रपती संभाजीनगर | प्रतिनिधी दैनिक शब्दमत न्युज नेटवर्क
महाराष्ट्र लोकसेवा आयोग (MPSC) मार्फत घेण्यात येणाऱ्या स्पर्धा परीक्षा पूर्वीप्रमाणेच ऑफलाइन (OMR आधारित) पद्धतीनेच घेण्यात याव्यात, अशी मागणी करत छत्रपती संभाजीनगरसह राज्यातील स्पर्धा परीक्षा विद्यार्थ्यांनी निवेदन सादर केले आहे.
विद्यार्थ्यांनी दिलेल्या निवेदनात म्हटले आहे की, स्पर्धा परीक्षा ही लाखो विद्यार्थ्यांच्या भविष्याशी निगडित असल्याने परीक्षेची पारदर्शकता, निष्पक्षता, समान संधी आणि आयोगावरील विश्वास कायम राहणे अत्यंत आवश्यक आहे. ऑनलाइन परीक्षा पद्धतीबाबत विद्यार्थ्यांमध्ये तांत्रिक अडचणी, विविध परीक्षा केंद्रांतील सुविधांमधील असमानता तसेच प्रक्रियेच्या पारदर्शकतेबाबत शंका व चिंता व्यक्त होत असल्याचेही निवेदनात नमूद करण्यात आले आहे.
या पार्श्वभूमीवर विद्यार्थ्यांचा आयोगावरील विश्वास अधिक दृढ राहावा आणि परीक्षेची विश्वासार्हता कायम राखण्यासाठी ऑफलाइन (OMR आधारित) परीक्षा पद्धतीच कायम ठेवावी, अशी कळकळीची मागणी विद्यार्थ्यांनी केली आहे.
या निवेदनावर राज्यातील स्पर्धा परीक्षा विद्यार्थ्यांच्या स्वाक्षऱ्या घेण्याचे अभियान सुरू असून, सुमारे १०० विद्यार्थ्यांच्या स्वाक्षऱ्या संकलित करण्यात येत आहेत. छत्रपती संभाजीनगर येथील विश्वभूषण मुरलीधर गवर, आशिष कडुभाऊ वानडे, स्वप्नील कैलास काळे आणि कार्तिक सुबाकर राऊत यांच्यासह अनेक विद्यार्थ्यांनी या मागणीला पाठिंबा दर्शविला आहे.
महाराष्ट्रातील लाखो स्पर्धा परीक्षा विद्यार्थ्यांच्या भावना आणि सार्वजनिक हित लक्षात घेऊन शासन व महाराष्ट्र लोकसेवा आयोगाने या निवेदनाचा सकारात्मक विचार करून ऑफलाइन परीक्षा पद्धत कायम ठेवण्याचा निर्णय घ्यावा, अशी मागणी विद्यार्थ्यांनी केली आहे.
